Պէյրութ
|
|
Հովանաւորութեամբ հայ կաթողիկէ պատրիարքական Պէյրութի թեմի ընդհանուր փոխանորդ, Զմմառու վանքի մեծաւոր գերպծ. հայր Գաբրիէլ թ. ծ. վրդ. Մուրատեանի եւ նախաձեռնութեամբ Զմմառեան միութեան ժառանգաւորաց տեսչութեան, կիրակի, 2 մարտ 2014-ի յետմիջօրէի ժամը 5-ին, Զմմառեան միաբանութեան Վերափոխման Սուրբ Կուսին եկեղեցւոյ մէջ, երանելի Իգնատիոս Մալոյեան Ժառանգաւորաց սաներուն կազմակերպութեամբ նշուեցաւ «Հայոց լեզուի օր»-ը:
Օրուան բանախօս Տիգրան կիս. սրկ. Փիլիպպոս անդրադարձաւ գաղթօճախներու մէջ առկայ ուծացման վտանգին եւ զայն կանխարգիլելու ուղիներ փնտռելու կարեւորութեան մասին:
Օրուան պատգամին մէջ, երանելի Իգնատիոս Մալոյեան Ժառանգաւորաց եւ Սուրբ Միքայէլ ընծայարանի տեսուչ Բարսեղ վրդ. Պաղտասարեան ըսաւ. «Ազգային նկարագիրի կարեւորագոյն բաղադրիչը հանդիսացող հայոց լեզուն, սփիւռքի պահպանութեան ամէնէն էական կռուանն է»:
Այնուհետեւ Լիբանանի մէջ Հայաստանի Հանրապետութեան արտակարգ եւ լիազօր դեսպան Աշոտ Քոչարեան ներկայացուց հայոց լեզուի օրուան ստեղծման հանգամանքները: Իր խօսքի աւարտին դեսպան Քոչարեան շնորհակալութիւն յայտնեց ձեռնարկը կազմակերպողներուն` ըսելով. «Իրարու շնորհաւորենք այսօր մայրենի լեզուի նուիրուած պետական տօնին առիթով եւ մեծարենք ու փառաբանենք մեր մեծասքանչ մայրենին` ամէնուրեք խօսելով հայերէն:
Աւարտին Զմմառու վանքի մեծաւոր գերպծ. հայր Գաբրիէլ թ. ծ. վրդ. Մուրատեան եւ Ժառանգաւորաց տեսուչ Բարսեղ վրդ. Պաղտասարեան ընծայարանի 50-ամեակի յուշանուէրով պարգեւատրեցին դեսպան Աշոտ Քոչարեանը: Գերապայծառ Մուրատեան վեր առաւ մայրենիին զարկ տալու գաղափարը եւ հայրենիքի մէջ Զմմառեան միաբանութեան գրանցման հարցը, ապա պահպանիչով եզրափակեց մայրենիին նուիրուած տօնակատարութիւնը:
Նշենք, որ Զմմառու վանքին «Զուարթնոց» պարբերաթերթին վերջին թիւը լոյս տեսաւ եւ ամբողջ օրինակը կը գտնէք հետեւեալ հասցէն այցելելով՝ http://armeniancatholic.net/test/img/zvartnots_2013.pdf