Լիբանանի մօտ Իրանի նորանշանակ դեսպանը՝ Մուհամէտ Ռիտա Ռաուֆ Շիպանի, ուղեկցութեամբ դեսպանատան քաղաքական խորհրդականին, Ուրբաթ, 9 Յունիս 2006ին, կէսօրէն առաջ այցելեց Հայ Կաթողիկէ Պատրիարքարան եւ ընդունուեցաւ Ամենապատիւ Տէր Ներսէս Պետրոս ԺԹ. Կաթողիկոս Պատրիարքին կողմէ: Աւելի քան ժամ մը տեւած հանդիպումին ներկայ եղան պետական երեսփոխան Մեթր Սերժ Թուրսարգիսեան եւ Թեմական Յանձնախումբի անդամներ:
Ն.Վ. Դեսպանը գնահատանքով խօսեցաւ Հայութեան մասին ընդհանրապէս եւ Իրանի Հայ համայնքի մասին մասնաւորաբար: Ան վստահեցուց իրանեան իշխանութիւններուն հոգատար ուշադրութեան առարկան են հայերը Իրանի մէջ: Այնուհետեւ տեղի ունեցած խօսակցութիւնը շօշափեց Լիբանանի եւ շրջանային կացութիւնը: Դեսպանը յայտնեց որ Իրան բացուած է բոլոր համայնքներուն եւ անվերապահօրէն կը քաջալերէ Լիբանանի մէջ շարունակուող ազգային երկխօսութիւնը, զայն նկատելով բոլոր խնդիրներու լուծման ապահով միջոցը:
Ապա, Ն.Վ. Դեսպանը տեղեկացուց այն ճնշումներու մասին, որոնց ժամանակէ մը ի վեր կ’ենթարկուի Իրան՝ հիւլէական ուժանիւթի իր ծրագրին պատճառով հակառակ անոր այդ ծրագիրը պիտի ծառայէ միայն խաղաղ նպատակներու եւ ժողովուրդի բարօրութեան: Ան ընդգծեց ժողովուրդներու իրենց սեփական ճակատագրին տէր մնալու, ինքնավարութեան եւ անկախութեան կարեւորութիւնը:
Ամենապատիւ Հոգեւոր Տէրը շնորհաւորեց նորանշակ դեսպանը, յաջողութիւն մաղթեց անոր եւ շնորհակալութիւն յայտնեց իրանեան իշխանութիւններուն կողմէ հայ համայնքին հանդէպ ցուցաբերուած հոգատար ուշադրութեան համար, վստահեցնելով որ հայերուն կեցուածքը միշտ թելադրուած է իրենց գտնուած երկիրներուն գերագոյն շահերէն: