Հռոմ
Ինչպէս տեղի կ՛ունենայ սովորաբար Սրբազան Քահանայապետի արտասահման ուղեւորութիւններու աւարտին, Թուրքիա այցելութեան աւարտին եւս, 30 Նոյեմբերին Հռոմ վերադարձի ճամբուն վրայ, օդանաւին մէջ, Ֆրանչիսկոս Սրբազան Քահանայապետը պատասխանած է իրեն ընկերակցող լրագրողներու հարցումներուն։ Անդրադառնալով մերձաւոր եւ միջին Արեւելքի եւ մասնաւորաբար Սուրիոյ կացութեան, ան դատապարտած է զէնքերու մաքսանենգութիւնն ու վաճառքը, ըսելով որ պատերազմներու ետին միշտ կը թաքնուին քաղաքական, տնտեսական եւ առեւտրական շահեր, որոնց առանցքը դրամ աստուածն է եւ ոչ թէ մարդ արարածը։ Ապա, հարցումի մը պատասխանելով, Սրբազան Քահանայապետը ընդգծած է որ Հայաստան-Թուրքիա սահմանին բացումը շատ կարեւոր հարց մըն է, սակայն ինք կը գիտակցի այս հարցը շրջապատող աշխարհաքաղաքական խնդիրներուն, եւ հրաւիրած է աղօթելու եւ օգնելու որպէսզի այս սահմանին բացումը իրականանայ։