Կարգաւորութիւն Սբ. Պատարագի.- էջ 3/12 (գրաբար)
Սարկաւագն Օրհնեա՛, տէր:
Քահանայն
ի ձայն ասասցէ.
Օրհնեալ թագաւորութիւնն Հօր եւ Որդւոյ եւ Հոգւոյն սրբոյ, այժմ եւ միշտ եւ յաւիտեանս յաւիտենից. Ամէն:
ԺԱՄԱՄՈՒՏ
"երգեն ժամամուտն ըստ պատշաճի աւուրն"
Սարկաւագն Եւ եւս խաղաղութեան զՏէր աղաչեսցուք: Ընկա՛լ, կեցո՛ եւ ողորմեա՛:
Օրհնեա՛, տէր:
Քահանայն Օրհնութիւն եւ փառք Հօր եւ Որդւոյ եւ Հոգւոյն սրբոյ, այժմ եւ միշտ եւ յաւիտեանս յաւիտենից. Ամէն:
Քահանայն Խաղաղութիւն ամենեցուն:
Դպիրքն Եւ ընդ հոգւոյդ քում:
Սարկաւագն Աստուծոյ երկրպագեսցուք:
Դպիրքն Առաջի քո, Տէր:
Քահանայն Տէր Աստուած մեր, որոյ կարողութիւնդ անքնին է եւ փառքդ անհասանելի, որոյ ողորմութիւնդ անչափ է եւ գթութիւնդ անբաւ, դու ըստ առատ մարդասիրութեան քում նայեա՛ց ի ժողովուրդս քո եւ ի տաճարս յայս սուրբ: Եւ արա՛ ընդ մեզ եւ ընդ աղօթակիցս մեր առատապէս զողորմութիւն քո եւ զգթութիւն: Զի քեզ վայելէ փառք իշխանութիւն եւ պատիւ, այժմ եւ միշտ եւ յաւիտեանս յաւիտենից. ամէն:
Քահանայն Տէր Աստուած մեր, կեցո՛ զժողովուրդս քո եւ օրհնեա՛ զժառանգութիւնս քո. զլրումն եկեղեցւոյ քո պահեա՛. սրբեա զսոսա՝ որք ողջունեցին սիրով զվայելչութիւն տան քոյ: Դու զմեզ փառաւորեա՛ աստուածային զօրութեամբ քով, եւ մի՛ թողուր զյուսացեալքս ի քեզ: Զի քո է կարողութիւն եւ զօրութիւն եւ փառք՝ այժմ եւ միշտ եւ յաւիտեանս յաւիտենից. Ամէն: Որ հասարակաց զայս եւ միաձայն մեզ ամենեցուն ուսուցեր աղօթել, եւ զերկուց եւ զերից միաձայնելոց յանուն քո զխնդրուածս պարգեւել խոստացար, դու եւ այժմ զծառայից քոց զխնդրուածս առ ի յօգուտն կատարեա՛, շնորհելով մեզ յայսմ յաւիտենիս զգիտութիւն քումդ ճշմարտութեան, եւ ի հանդերձեալսն զկեանսն յաւիտենականս պարգեւելով: Զի բարերար եւ մարդասէր ես, Աստուած, եւ քեզ վայելէ փառք, իշխանութիւն եւ պատիւ՝ այժմ եւ միշտ եւ յաւիտեանս յաւիտենից. Ամէն: Տէր Աստուած մեր, որ կարգեցեր յերկինս զդասս եւ զինուորութիւնս հրեշտակաց եւ հրեշտակապետաց ի սպասաւորութիւն փառաց քոց, արա այժմ ընդ մուտս մեր մտանել եւ սրբոց հրեշտակաց, եւ լինել պաշտօնակից մեզ եւ փառաբանակից քումդ բարերարութեան:
Դպիրքն
երգեն Ճաշու շարական

Կիւրակէից՝ Յարութեան Տէր Թագաւորեաց ...:

Ծննդեան՝ Մեծացուսցէ ...:

Յարութեան Գովեա՛ Երուսաղէմ, զՏէր ...:
Քահանայն Զի քո է կարողութիւն եւ զօրութիւն եւ փառք յաւիտեանս. ամէն:
"ԵՐԵՔՍՐԲԵԱՆ"
Սարկաւագն Պռօսխումէ:
Դպիրքն
Սուրբ Աստուած, սուրբ եւ հզօր, սուրբ եւ անմահ,

Խաչի, Եկեղեցւոյ, Սրբոց տօնից, Պահոց, Քառասնորդաց.
-որ խաչեցար վասն մեր


Զատկի Յարութեան, Յինանց, Կիւրակամտից եւ Կիւրակէից.
-որ յարեար ի մեռելոց


Ծննդեան Տեառն եւ Յայտնութեան.
-որ ծնար եւ յայտնեցար,


Տեառնընդառաջին, Ծաղկազարդին եւ Աւագ ԲՇ. ԳՇ. ԴՇ. ԵՇ.
-որ եկիր եւ գալոցդ ես,


Տնօրէնութեան, Աւետման
-որ մարմնացար վասն մեր,


Համբարձման.
-որ համբարձար փառօք առ Հայր,


Հոգեգալստեան,
-որ եկիր եւ հանգեար յառաքեալսն,


Վարդավառին.
-որ յայտնեցար ի Թաբոր լերինն,


Վերափոխման.
-որ եկիր ի փոխումն Մօր քոյ եւ Կուսին,


ողորմեա՛ մեզ:
Քահանայն
Աստուած սուրբ, որ ի սուրբս հանգուցեալ ես, եւ երեքսրբեան ձայնիւ սերովբէք գովեն զքեզ, եւ քերովբէք փառաբանեն, եւ ամենայն երկնային զօրութիւնքն քեզ երկիր պագանեն: Որ ի չգոյէ ի գո ածեր զամենայն արարածս: Որ արարեր զմարդն՝ ըստ պատկերի քում եւ նմանութեան, եւ ամենայն շնորհիւ քով զնա զարդարեցեր, եւ ուսուցեր խնդրել զիմաստութիւն եւ զզգօնութիւն. եւ ոչ անտես արարեր զմեղուցեալն, այլ եդիր ի վերայ նորա զապաշխարութիւն փրկութեան: Որ արժանի արարեր զմեզ զնուաստացեալ եւ զանարժան ծառայքս քո ի ժամուս յայսմիկ կալ առաջի փառաց սրբութեան սեղանոյ քոյ, եւ զօրինաւոր երկրպագութիւն եւ զփառաբանութիւն մատուցանել քեզ: Դու Տէր, ընկա՛լ ի բերանոյ մեղաւորացս զերեքսրբեան օրհնութիւնս, եւ պահեա՛ զմեզ քոյին քաղցրութեամբդ: Թո՛ղ մեզ զամենայն յանցանս մեր զկամայ եւ զակամայ: Սրբեա՛ զհոգի, զմիտս եւ զմարմինս մեր. եւ շնորհեա՛ ի սրբութեան պաշտել զքեզ զամենայն աւուրս կենաց մերոց. բարեխօսութեամբ սրբուհւոյ Աստուածածնին, եւ ամենայն սրբոց քոց, որք յաւիտենից քեզ բարեհաճոյացան: Զի սուրբ ես տէր Աստուած մեր, եւ քեզ վայելէ փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. ամէն:
ՔԱՐՈԶ ՀԱՄԱՇԽԱՐՀԱԿԱՆ
Քահանայն
բազկատարած ասասցէ ի ծածուկ
Տէր Աստուած մեր, զբազկատարած զաղաչանս ծառայից քոց վերընկալցիս, եւ ողորմեսցիս՝ ըստ մեծի ողորմութեան քում: Զգթութիւն քո առաքեա՛ ի վերայ մեր եւ ամենայն ժողովրդեանս, որք ակն ունին առ ի քէն առատ ողորմութեանդ:
Սարկաւագն Եւ եւս խաղաղութեան զՏէր աղաչեսցուք:

Դպիրքն Տէր, ողորմեա՛:

Սարկաւագն Վասն խաղաղութեան ամենայն աշխարհի եւ հաստատութեան սրբոյ Եկեղեցւոյ, զՏէր աղաչեսցուք:

Դպիրքն Տէր, ողորմեա՛:

Սարկաւագն Վասն ամենայն սուրբ եւ ուղղափառ եպիսկոպոսաց, զՏէր աղաչեսցուք:

Դպիրքն Տէր, ողորմեա՛:

Սարկաւագն Վասն սրբազան Պապին մերոյ Տեառն Ա. Ա.ի կենաց եւ փրկութեան հոգւոյ նորին, զՏէր աղաչեսցուք:

Դպիրքն Տէր, ողորմեա՛:

Սարկաւագն Վասն Ամենապատիւ Պատրիարքին մերոյ Տեառն Ա. Ա.ի կենաց եւ փրկութեան հոգւոյ նորին, զՏէր աղաչեսցուք:

Դպիրքն Տէր, ողորմեա՛: Յիշեա՛ Տէր, եւ ողորմեա՛: Տէր ողորմեա՛: Քեզ տեառնդ յանձն եղիցուք: Տէր, ողորմեա՛: Տէր, ողորմեա՛: Տէր, ողորմեա՛:

Սարկաւագն Օրհնեա՛, տէր:

Քահանայն ի ձայն
Զի ողորմած եւ մարդասէր ես Աստուած գոլով եւ քեզ վայելէ փառք, իշխանութիւն եւ պատիւ այժմ եւ միշտ եւ յաւիտեանս յաւիտենից. Ամէն:



1 - 2 - 3 - 4 - 5 - 6 - 7 - 8 - 9 - 10 - 11 - 12

Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ