Կարգաւորութիւն Սբ. Պատարագի.- էջ 11/12 (գրաբար)
Քահանայն ահիւ եւ դողութեամբ ճաշակեսցէ ի մարմնոյն, եւ արբցէ ի բաժակէն՝ ասելով.
Մարմին քո անապական լիցի ինձ ի կեանս:
Սարկաւագն Ամէն:
Քահանայն Եւ սուրբ արիւն քո՝ ի քաւութիւն եւ ի թողութիւն մեղաց:
Սարկաւագն Ամէն:
Երկիւղիւ եւ հաւատով յառաջ մատիք եւ սրբութեամբ հաղորդեցարուք:
Ասացէ՛ք. մեղայ Աստուծոյ:
Հաւատամք ի Հայր սուրբ Աստուած ճշմարիտ:
Հաւատամք յՈրդին սուրբ Աստուած ճշմարիտ:
Հաւատամք ի Հոգին սուրբ Աստուած ճշմարիտ:
Խոստովանիմք եւ հաւատամք զի սա է ճշմարիտ մարմին եւ արիւն Տեառն մերոյ Յիսուսի Քրիստոսի, որ բառնայ զմեղս աշխարհի:
Քահանայն Մարմին եւ արիւն Տեառն մերոյ Յիսուսի Քրիստոսի, լիցի քեզ ի փրկութիւն եւ առաջնորդ յանվախճան ի կեանս:
Դպիրքն Ամէն:
Աստուած մեր եւ Տէր մեր երեւեցաւ մեզ, օրհնեալ եկեալ անուամբ Տեառն:
Քահանայն խաչակնքեսցէ զժողովուրդն եւ ասասցէ
Կեցո՛, Տէր զժողովուրդս քո, եւ օրհնեա՛ զժառանգութիւնս քո, հովուեա՛ եւ բարձրացո՛ զնոսա՝ յայսմհետէ մինչեւ յաւիտեան:
Քահանայն Քահանայն ի ծածուկ
Գոհանամք զքէն, Հայր ամենակալ, որ պատրաստեցեր մեզ նաւահանգիստ՝ սուրբ զԵկեղեցի, տաճար սրբութեան, ուր փառաբանի սուրբ Երրորդութիւնդ. Ալէլուիա:
Գոհանամք զքէն, Քրիստոս թագաւոր, որ պարգեւեցեր մեզ կենդանութիւն՝ կենարար մարմնով եւ արեամբդ քով սրբով. շնորհեա՛ զքաւութիւն եւ զմեծ զողորմութիւն. Ալէլուիա:
Գոհանամք զքէն, Հոգիդ ճշմարիտ, որ նորոգեցեր սուրբ զԵկեղեցի. անարատ պահեա՛ հաւատով Երրորդութեանդ՝ յայսմհետէ մինչեւ յաւիտեան. Ալէլուիա:
Գոհանամք զքէն, Քրիստոս Աստուած, որ զայսպիսի ճաշակումն բարութեան շնորհեցեր մեզ ի սրբութիւն կենդանութեան: Սովիմբ պահեա՛ զմեզ սուրբս եւ անարատս, բնակեալ զմեօք քո աստուածային խնամովքդ: Հովուեա՛ զմեզ յանդաստանի կամաց քոց սրբոց եւ բարեսիրաց, որով ամրացեալք յամենայն բանսարկուին ընդդիմութեանց, քումդ եւեթ արժանի եղիցուք լսել ձայնի, եւ քեզ միայնոյ քաջայաղթ եւ ճշմարիտ Հովուիդ հետեւել, եւ առ ի քէն ընդունել զպատրաստեալ տեղի յարքայութեանդ երկնից, Աստուած մեր եւ Տէր մեր եւ փրկիչ Յիսուս Քրիստոս, որ ես օրհնեալ՝ ընդ Հօր եւ ընդ սուրբ Հոգւոյդ՝ այժմ եւ միշտ եւ յաւիտեանս յաւիտենից. Ամէն:
Սրբեալ զշրթունս իւր եւ զսկիհն՝ սքողեսցէ
եւ եդեալ զսաղաւարտն ի գլուխն իւր՝ ի ծածուկ ասասցէ:
Խաղաղութիւն ընդ ամենեսեան:
Անքնին, անհաս, երրեակ ինքնութեանդ, հաստիչ, ընդունող եւ անբաժանելի միասնական սուրբ Երրորդութեանդ վայել է փառք, իշխանութիւն եւ պատիւ, այժմ եւ միշտ եւ յաւիտեանս յաւիտենից. Ամէն:



1 - 2 - 3 - 4 - 5 - 6 - 7 - 8 - 9 - 10 - 11 - 12

Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ