Պէյրութ
Տանն Կիլիկիոյ կաթողիկէ հայոց Ներսէս Պետրոս ԺԹ. կաթողիկոս պատրիարքը երէկ այցելեց Տար Ֆաթուա, ուր հանդիպում մը ունեցաւ հանրապետութեան միւֆթի շէյխ Ապտել Լաթիֆ Տըրիանի հետ:
Հանդիպումին ընթացքին հոգեւոր տէրը ընդգծեց Տար Ֆաթուայի ազգային դերակատարութեան կարեւորութիւնը, ինչպէս նաեւ Լիբանանի հարցերը իմաստուն կերպով լուծելու անոր կարողութիւնը, «յատկապէս Լիբանանի դիմագրաւած այս դժուար եւ զգայուն հանգրուանին», ըսաւ ան:
Հոգեւոր Տէրը շեշտեց, որ այս պայմաններուն տակ Լիբանան կարիքը ունի քաղաքացիական եւ հոգեւոր ղեկավարութիւններուն` աւելցնելով, որ իր կատարած այցելութեան նպատակն է ծառայել կրօնական եւ ազգային հարցերուն` իրարու միջեւ փոխըմբռնում գոյացնելով:
«
Լիբանան այսօր կարիքը ունի իր բոլոր զաւակներուն` նկատի ունենալով անոր դիմագրաւած պայմանները», ըսաւ հոգեւոր տէրը` հաստատելով, որ այս հանգրուանին բոլորը պէտք է գիտակցին երկրին դիմագրաւած վտանգներուն եւ համախոհութիւն գոյացնեն` Լիբանանը իր տագնապներէն դուրս բերելու համար: