Հռոմ
Շաբաթ 23 հոկտեմբեր 2010-ին երեկոյեան, Հռոմի քահանայապետական Լեւոնեան հայ վարժարանէն ներս, ամենապատիւ եւ գերերջանիկ հոգեւոր տիրոջ տէր Ներսէս Պետրոս ԺԹ. կաթողիկոս պատրիարք Տանն Կիլիկիոյ կաթողիկէ հայոց գահակալութեան 11-ամեակի տօնակատարութիւնը տեղի ունեցաւ:
Տօնակատրութեան ներկայ էին հայ կաթողիկէ Եկեղեցւոյ սիւնոդոսական հայրերը, վարժարանին մեծաւոր եւ փոխ մեծաւոր հայրերը, վարդապետներ եւ վարժարանին ժառանգաւորները:
Կարկանդակի բեկանումէն ետք, հոգեւոր տէրը իր սրտին խօսքը հաղորդեց ներկաներուն, շեշտելով քահանային սուրբ կենցաղաւարին, խոնարհութեան եւ աղօթասիրութեան մասին:
Յիշենք, որ բոլոր հայ կաթողիկէ եկեղեցիներուն մէջ յատուկ աղօթքներ բարձրացան վասն Հայրապետին։
Այս առիթով, հայ կաթողիկէ պատրիարքարանի կայքէջի անձնակազմը կը շնորհաւորէ ամենապատիւ հոգեւոր տէրը եւ կը փոխանցէ իր լաւագոյն մաղթանքները գահակալութեան 11-րդ տարեդարձին համար: