Պուրճ Համմուտ
Հայ կաթողիկէ Մեսրոպեան բարձրագոյն վարժարանի տնօրէնութիւնը ուրախութեամբ կը յայտարարէ, որ 20010-2011 կրթական տարեշրջանի Լիբանանեան պաքալորէայի պետական քննութիւններուն հայկական վարժարաններուն մէջ Մեսրոպեան վարժարանը այս տարի եւս արձանագրած է գնահատելի եւ պատուաբեր արդիւնքներ։
Ուրախութեամբ կը յայտնենք, որ Ընդհանուր գիտութեան մէջ առաջինը հանդիսացած է մեր վարժարանէն Սագօ Հալլաճեանը, իսկ Գրականութեան բաժինին մէջ` Ռիթա Ֆերմանեանը: Նաեւ Կենսաբանութեան բաժինին մէջ «լաւ» յիշատակութեան արժանացած է Փաթիլ Մարսիմը:
Արդիւնքները հաստատուած են ՀՅԴ Զաւարեան Ուսանողական միութեան կազմակերպուած պաքալորէայի գերազանց նիշ ապահոված աշակերտներու պարգեւատրման հանդիսութեան ընթացքին, որ քաջալերական եւ մեծապէս գնահատանքի արժանի աւանդութեան վերածուած ձեռնարկ մըն է:
Այս առիթով, վարժարանի տնօրէնութիւնը կը շնորհաւորէ ուսուցչական կազմը, ծնողներն ու աշակերտները, որոնց գործակցութեամբ, նուիրումով եւ հաւաքական աշխատանքով կարելի եղած է բարձր պահել Մեսրոպ Մաշտոցի շունչով գործող Մեսրոպեան վարժարանը` բարձրագոյն ու բարձրորակ ուսման եւ հոգեւոր ու հայեցի դաստիարակութեան ջամբման հայաշունչ կառոյցը։
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ
ՎԱՐԺԱՐԱՆԻ ՏԵՍՉԱԿԱՆ ԳՐԱՍԵՆԵԱԿ