Գահիրէ
Յանուն համայն աշխարհի եւ յատկապէս Եգիպտոսի խաղաղութեան, միասնական աղօթք կատարուեցաւ հինգշաբթի 27 Հոկտեմբերի երեկոյեան, Հելիոպոլսոյ Սուրբ Թերեզա եկեղեցւոյ մէջ:
Աղօթքը հրաւիրած էր Եգիպտոսի հայ կաթողիկէ թեմի առաջնորդ գերապայծառ տէր Գրիգոր Օգոստինոս եպիսկոպոս Գուսան եւ Եգիպտոսի մօտ Վատիկանի դեսպան Մայքըլ Լուիս Արքեպիսկոպոս Ֆիծճերալտ:
Ներկայ եղած են ներկայացուցիչներ Եգիպտոսի բոլոր կրօնական համայնքներէն, ներառեալ Եգիպտոսի հայոց թեմի առաջնորդ Գերաշնորհ տէր Աշոտ եպիսկոպոս սրբազան Մնացականեան, Սուտանի հոգեւոր հովիւ տէր Գաբրիէլ Աբեղայ Սարգիսեան:
Ներկաներու շարքին էին նաեւ Հայաստանի դեսպան Արմէն Մելքոնեան, Գահիրէի Քաղաքական Ժողովի ատենապետ Գէորգ Երզնկացեան:
Խօսք արտասանեցին «Ազհարի» եւ «Վագէֆներու» շէյխերէն, ինչպէս նաեւ ղպտիական, յունական եւ բողոքական եկեղեցիներու առաջնորդներ կամ ներկայացուցիչներ:
Եգիպտոս կը մնայ առանց նախագահի եւ խորհրդարանի յետ Յունուար 25-էն Փետրուար 11-ի միջոցին կատարուած զանգուածային ցոյցերէն, որոնք ստիպեցին նախագահ Հոսնի Մուպարաքին որ հրաժարի իր 30-տարի վարած պաշտօնէն: 27 ղպտի ցուցարարներ սպաննուած են Հոկտեմբեր 9-ին Գահիրէի մէջ եգիպտական բանակին հետ բախումներու հետեւանքով: