Կարգաւորութիւն Սբ. Պատարագի.- էջ 8/12 (գրաբար)
Քահանայն տարածեալ զձեռս, աղօթեսցէ ի ծածուկ
Սովաւ շնորհեա՛ զսէր, զհաստատութիւն եւ զըղձալի զխաղաղութիւն ամենայն աշխարհի. սրբոյ Եկեղեցւոյ եւ ամենայն ուղղափառ եպիսկոպոսաց, քահանայից, սարկաւագաց, թագաւորաց աշխարհի, իշխանաց, ժողովրդոց, ճանապարհորդելոց, նաւելոց, կապելոց, վտանգելոց, աշխատացելոց եւ որք ի պատերազմունս բարբարոսաց: Սովաւ եւ օդոց շնորհեա՛ զբարեխառնութիւն եւ անդոց զպտղաբերութիւն եւ ախտելոց ի պէսպէս ցաւս՝ փութապէս զառողջութիւն: Սովաւ հանգո՛ զամենեսեան յառաջագոյն ի Քրիստոս զննջեցեալսն՝ զնախահարս, զհայրապետս, զմարգարէս, զառաքեալս, զվկայեալս, զեպիսկոպոսունս՝ զերիցունս, զսարկաւագունս եւ զբնաւ ուխտ Եկեղեցւոյ քում սրբոյ, եւ զամենեսեան՝ որք յաշխարհական կարգէ զարս եւ զկանայս հաւատով վախճանեալս:
Դպիրքն Հոգի Աստուծոյ, որ զփառակցի քոյ խորհուրդ իջեալ ի յերկնից կատարես ի ձեռս մեր, հեղմամբ արեան սորա, աղաչեմք զքեզ, հանգո՛ զհոգիս մեր ննջեցելոցն:
Քահանայն ի ձայն Ընդ որս եւ մեզ այց արասցես, բարերար Աստուած, աղաչեմք:
Դպիրքն Յիշեա՛, Տէր, եւ ողորմեա՛:
Քահանայն Աստուածածնին սրբոյ Կուսին Մարիամու եւ Յովհաննու Մկրտչին, Ստեփանոսի նախավկային եւ սրբոյ Հօրն մերոյ Գրիգորի Լուսաւորչին եւ ամենայն սրբոց՝ եղիցի յիշատակ ի սուրբ պատարագս, աղաչեմք:
Սարկաւագն գնալով յաջակողմն սեղանոյն՝ ձեռնամած ասասցէ
Առաքելոց սրբոց, մարգարէից, վարդապետաց, մարտիրոսաց եւ ամենայն հայրապետաց սրբոց, առաքելագործ եպիսկոպոսաց, երիցանց, ուղղափառ սարկաւագաց եւ ամենայն սրբոց, եղիցի յիշատակ ի սուրբ պատարագս, աղաչեմք:
Դպիրքն Յիշեա՛, Տէր, եւ ողորմեա՛:
Սարկաւագն Օրհնեալ, գովեալ եւ փառաւորեալ, հրաշալի եւ աստուածազարդ յարութեանն Քրիստոսի երկիր պագանեմք:
Դպիրքն փառք յարութեան քոյ, Տէր:
Քահանայն Յիշեա՛, Տէր, եւ ողորմեա՛, եւ օրհնեա՛ զսուրբ կաթուղիկէ եւ առաքելական Եկեղեցի քո զոր փրկեցեր պատուական արեամբ Միածնի քոյ, եւ ազատեցեր խաչիւն սրբով. շնորհեա՛ սմա զանշարժ զխաղաղութիւն: Յիշեա՛, Տէր, եւ ողորմեա՛ եւ օրհնեա՛ զամենայն ուղղափառ եպիսկոպոսունս, որք ուղիղ վարդապետութեամբ համառօտեն ի մեզ զբանն ճշմարտութեան:
Դպիրքն Առաջնորդացն մերոց, եւ առաջին լուսաւորչացն սրբոց Թադէոսի եւ Բարթուղիմէոսի առաքելոցն եւ Գրիգորի Լուսաւորչին, Արիստակիսի, Վրթանիսի, Յուսկանն, Գրիգորիսի, Ներսիսի, Սահակայ, Դանիելի եւ Խաթայ, Մեսրոպայ Վարդապետին եւ Գրիգորի Նարեկացւոյն եւ Ներսիսի Կլայեցւոյն եւ Ներսիսի Լամբրոնացւոյն, եւ ամենայն սրբոց հովուաց եւ հովուապետացն Հայաստանեայց, եղիցի յիշատակ ի սուրբ պատարագս, աղաչեմք:
Դպիրքն Յիշեա՛, Տէր, եւ ողորմեա՛:
Դպիրքն Ընդհանուր ամենայն հաւատացելոց, արանց եւ կանանց, ծերոց եւ տղայոց, եւ ամենայն չափու հասակի հաւատով եւ սրբութեամբ ի Քրիստոս ննջեցելոց, եղիցի յիշատակ ի սուրբ պատարագս, աղաչեմք:
Քահանայն ի ձայն Եւս առաւել զՍրբազան Պապն մեր զՏէր "Ա. Ա." եւ զԳերերջանիկ Հայրապետն մեր զՏէր "Ա. Ա." շնորհեսցես մեզ ընդ երկայն աւուրս ուղիղ վարդապետութեամբ:
Քահանայն Յիշեա՛, Տէր, եւ ողորմեա՛ եւ օրհնեա՛ զքո առաջի կացեալ ժողովուրդս եւ զպատարագիս մատուցողս, եւ պարգեւեա՛ սոցա զպիտոյսն եւ զօգտակարսն:
Յիշեա՛, Տէր, եւ ողորմեա՛ եւ օրհնեա՛ զուխտաւորս եւ զպտղաբերիչս Եկեղեցւոյ քո սրբոյ, եւ որք յիշեն զաղքատս ողորմածութեամբ. եւ հատո՛ նոցա զպարտս նոցա՝ ըստ ընդաբոյս առատութեան քոյ՝ հարիւրապատիկ աստ եւ ի հանդերձելումդ: Յիշեա՛, Տէր, եւ ողորմեա՛, եւ գթա՛ ի հոգիս հանգուցելոցն, հանգո՛ զնոսին եւ լուսաւորեա՛, եւ դասաւորեա՛ ընդ սուրբս քո յարքայութեանդ երկնից, եւ արժանի արա ողորմութեան քում:
"Եթէ ննջեցեալ իցէ"Յիշեա՛, Տէր, եւ զհոգի ծառայի (կամ աղախնոյ) քոյ Ա.Ա. եւ ողորմեա՛ նմա ըստ մեծի ողորմութեան քում, եւ հանգո՛ այցելութեամբ ի լոյս երեսաց քոց:
"Իսկ եթէ կենդանի իցէ"Յիշեա՛, Տէր եւ զծառայ (կամ զաղախին) քո Ա.Ա. եւ ողորմեա՛ նմա՝ ըստ մեծի ողորմութեան քում, եւ փրկեա՛ զնա յամենայն որոգայթից հոգւոյ եւ մարմնոյ:

Յիշեա՛, Տէր, եւ զայնոսիկ՝ որք յանձնեցին մեզ յիշատակել յաղօթս, զկենդանիս եւ զհանգուցեալս. կառավարեա զկամս հայցմանց նոցա եւ զմերս՝ ընդ ուղղորդն, եւ որ լին է փրկութեամբ: Եւ վարձատրեա՛ բոլորեցունց զանանց եւ զերանելի բարութիւնսդ: Եւ զտեալ զխորհուրդս մեր, տաճարացո յընդունակութիւն մարմնոյ եւ արեան միածնի քոյ Տեառն մերոյ եւ փրկչին Յիսուսի Քրիստոսի: Ընդ որում քեզ Հօր ամենակալի, հանդերձ կենդանարար եւ ազատիչ Սուրբ Հոգւովդ՝ վայելէ փառք, իշխանութիւն եւ պատիւ, այժմ եւ միշտ եւ յաւիտեաս յաւիտենից . Ամէն:
Սարկաւագն Գոհութիւն եւ փառաբանութիւն մատուցանեմք քեզ Տէր Աստուած մեր՝ վասն սուրբ եւ անմահ պատարագիս որ ի վերայ սրբոյ սեղանոյս: Զի զսա մեզ ի սրբութիւն կենդանութեան պարգեւեսցես: Սովաւ շնորհեա զսէր, զհաստատութիւն, եւ զղձալի զխաղաղութիւն ամենայն աշխարհի, սրբոյ եկեղեցւոյ, եւ ամենայն ուղղափառ եպիսկոպոսաց: Եւս առաւել սրբազան Պապին մերոյ Տեառն Յովհաննու Պօղոսի Քահանայապետին, եւ Գերերջանիկ Պատրիարգին մերոյ Տեառն Ներսիսի Պետրոսի Կաթողիկոսին, եւ քահանայիս որ զպատարագս մատուցանէ: Եւ վասն զօրութեան եւ յաղթութեան թագաւորաց քրիստոնէից եւ իշխանացն բարեպաշտից: Աղաչեսցուք եւ խնդրեսցուք եւ վասն հոգւոցն հանգուցելոց: Եւս առաւել վասն հանգուցեալ րաբունապետացն մերոց, եւ շինողաց սուրբ եկեղեցւոյս, եւ որք ընդ հովանեաւ սորին են հանգուցեալ: Ազատութիւն եղբարց մերոց գերելոց, եւ շնորհ առաջիկայ ժողովրդեանս: Հանգիստ հաւատով եւ սրբութեամբ ի Քրիստոս կատարելոցն: Եղիցի յիշատակ ի սուրբ Պատարագս, աղաչեմք:
Քահանայն Եւ եղիցի ողորմութիւն մեծիս Աստուծոյ եւ փրկչիս մերոյ Յիսուսի Քրիստոսի՝ ընդ ձեզ, ընդ ամենեսեան:



1 - 2 - 3 - 4 - 5 - 6 - 7 - 8 - 9 - 10 - 11 - 12

Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ