|
Երկուշաբթի, 29 Դեկտեմբեր 2014 - Ամենապատիւ Հոգեւոր Տէրը Նախագահեց Սուրբ Ծննդեան Տօնին Առիթով Մատուցուած Պատարագին
Հինգշաբթի, 25 դեկտեմբեր 2014-ին, առաւօտեան ժամը 10:00-ին, Հայ կաթողիկէ Սուրբ Գրիգոր Լուսաւորիչ-Սուրբ Եղիա աթոռանիստ եկեղեցւոյ մէջ Տանն Կիլիկիոյ կաթողիկէ հայոց Ներսէս Պետրոս ԺԹ. կաթողիկոս պատրիարքը նախագահեց Սուրբ Ծննդեան տօնին առիթով մատուցուած Սուրբ եւ անմահ պատարագին:
Ամենապատիւ հոգեւոր տէրը այս առիթով ուղղած իր պատգամին մէջ շեշտը դրաւ Յիսուս Քրիստոսի խաղաղութեան կոչին վրայ: Ան այս առնչութեամբ ի միջի այլոց նշեց.
« Խաղաղութիւնը շնորհ մըն է, որ Յիսուս մեզի կը պարգեւէ, երբ կ՛ըսէ. «Խաղաղութիւնս կը թողում ձեզի, իմ խաղաղութիւնս կու տամ ձեզի. զայն չեմ տար ձեզի, ինչպէս աշխարհը կու տայ» (Յովհ. 14,27):
« Յիսուս մեզի նոր պատուիրան մըն ալ տուաւ, երբ ըսաւ. «Սիրեցէ՛ք զիրար: Ինչպէս ես ձեզ սիրեցի, այնպէս ալ դուք զիրար սիրեցէք», եւ կ՛աւելցնէ սա նշանակալի խօսքը. «Բոլորը ձեզ պիտի ճանչնան իբրեւ իմ աշակերտներս, եթէ դուք զիրար սիրէք» (Յովհ. 13, 34-35): Եկեղեցւոյ հիմնարկութենէն ի վեր այս է ամէն քրիստոնեայի պիտակը` ամէն մարդ սիրել, առանց բացառութեան: Ուստի, սէրը Յիսուսէն կը բխի եւ խաղաղութիւնը` սէրէն:
Ոչ ոք կ՛ուզէ կռիւ կամ խռովութիւն, եւ ամէն մարդ կը բաղձայ խաղաղ կեանք ունենալ: Արդ, խաղաղութիւնը սիրտէն կը սկսի եւ սիրով կը սնանի, եւ անկէ կը տարածուի մօտիկներուն ու հեռաւորներուն, եւ յատուկ կերպով անոնց, որոնք ամէնէն աւելի կարիք ունին խաղաղութեան, ընտանիքներուն մէջ` ամուսինին եւ կնոջ միջեւ, ազգականներուն մօտ` դրամական հարցերու պատճառով, ծանօթներուն միջեւ` նախանձի պատճառով, եւ օրինակները շատ են:
Խաղաղութիւնը, ինչպէս ըսի, Աստուծոյ պարգեւն է, բայց խաղաղութիւնը գոյացնելը նախ եւ առաջ մեր` քրիստոնեաներուս պատասխանատուութիւնն է: Մենք կոչուած ենք կամուրջ դառնալու` ուրիշներուն հասցնելու համար Աստուծոյ խաղաղութիւնը: Յիւսուս ըսաւ. «Երանի՜ խաղաղարարներուն, որովհետեւ անոնք Աստուծոյ որդիներ պիտի կոչուին» (Մտթ. 5,9): Յիսուս չըսաւ` երանի խաղաղասէրներուն, այլ` խաղաղարարներուն, այսինքն` երանի անոնց, որոնք կ՛աշխատին խաղաղութիւնը հաստատել հակառակորդ մարդոց միջեւ:
« Յիսուսի քարոզած խաղաղութիւնը բոլորովին տարբեր է եւ կը հակասէ աշխարհի յառաջացուցած խաղաղութեան: Պատմութեան մէջ կը կարդանք Օգոստոս կայսեր խօսքը, որ կ՛ըսէ, թէ ինք խաղաղութիւնը հաստատեց աշխարհի վրայ իր զինուորական յաղթանակներուն շնորհիւ:
« Կարելի է ըսել, թէ խաղաղութիւնը, որ Յիսուս Քրիստոս հաստատեց, ան ալ Անոր յաղթանակներուն շնորհիւ է: Բայց, Յիսուսի յաղթութիւնները չեղան թշնամիները սպաննելով, այլ` անոնց համար մեռնելով, ինչպէս որ Սուրբ Պօղոս կ՛ըսէ, թէ խաչի վրայ «Յիսուս յաղթեց մահուան», բայց չ՛ըսեր, որ Յիսուս սպաննեց թշնամիները»:
Սուրբ պատարագէն ետք ամենապատիւ հոգեւոր տէրը Սուրբ Ծննդեան առիթով շնորհաւորութիւնները ընդունեց եկեղեցւոյ մէջ, ապա շնորհաւորական ընդունելութիւնները շարունակուեցան Հայ կաթողիկէ պատրիարքարանին մէջ:
|