Արժանթին
Յունիսի 24-ին Պուէնոս Այրէսի Մայր տաճարին մէջ, Արժանթինի հայ համայնքին կողմէ երախտագիտութեան հանդիսութիւն պիտի կատարուի ի պատիւ Ֆրանչիսկոս Սրբազան Քահանայապետին՝ Հայոց ցեղասպանութեան միջազգային ճանաչման անոր վճռորոշ աջակցութեան համար:
Prensa Centro Armenio-ն կը տեղեկացնէ որ արարողութիւնը պիտի կատարեն արժանթինահայ համայնքի կրօնական առաջնորդները` Արժանթինի հոգեւոր առաջնորդ եւ Պուէնոս Այրէսի արքեպիսկոպոս, կարդինալ Մարիօ Պոլիի գլխաւորութեամբ:
Այս մասին Սրբազան Քահանայապետին ուղղուած արժանթինահայ համայնքի նամակին մէջ ըսուած է.
«Յարգարժան Հայր Սուրբ,
Պատիւն ունինք դիմելու Նորին Սրբութեանդ` Արժանթին բնակող հայ համայնքին անունով, 20-րդ դարուն տեղի ունեցած առաջին ցեղասպանութեան հարիւրերրորդ տարելիցին այս յուզումնառատ եւ հայրենասիրական եռանդով լեցուն տարուան ընթացքին:
Հայր Սուրբ, մեր շնորհակալութիւնը կը յայտնենք Ձեր զօրակցութեան եւ այս ցաւալի տարելիցին մեր սրտերը ուրախացնելու համար: Շնորհակալութիւն Ձեր ձայնը բարձրացնելու համար` յաջակցութիւն այս փոքր, սակայն արժէքաւոր ժողովուրդին, որ դարերու ընթացքին հաւատարիմ մնացած է իր հաւատքին. խոշտանգուած եւ հալածուած է, սակայն վերածնուած է մոխիրէն»:
Յիշեցնենք որ Հայոց ցեղասպանութեան հարիւրերորդ տարելիցի միջազգային ոգեկոչման առթիւ` ապրիլի 12-ին Ֆրանչիսկոս Քահանայապետը Վատիկանի Սուրբ Պետրոս տաճարին մէջ Պատարագ մատուցանեց, որուն ընթացքին արտասանած խօսքին մէջ հայ ժողովուրդին տառապանքները բնութագրեց որպէս «20-րդ դարու առաջին ցեղասպանութիւն»:
Իր ելոյթին մէջ, Քահանայապետը ըսաւ. «Ծածկել յանցանքը, կը նշանակէ ձգել, որ վէրքը արիւնահոսի», եւ այս խօսքով ան հաստատեց Թուրքիոյ ժխտողական քաղաքականութեան առկայութիւնը: