Կարգաւորութիւն Սբ. Պատարագի.- էջ 10/12 (գրաբար)
Քահանայն Եւ զայս ասացեալ երկրպագեսցէ եւ համբուրեսցէ զսեղանն,
Եւ զայս ասացեալ երկրպագեսցէ եւ համբուրեսցէ զսեղանն, եւ առեալ զսուրբ մարմինն ողջ թացցէ յանապական արիւնն, եւ ասասցէ.

Տէր Աստուած մեր, որ կոչեցեր զմեզ յանուն Միածնի Որդւոյ քոյ քրիստոնեայս, եւ շնորհեցեր մեզ մկրտութիւն հոգեւոր աւազանաւն ի թողութիւն մեղաց, եւ արժանի արարեր զմեզ հաղորդել սուրբ մարմնոյ եւ արեան Միածնի քոյ: Եւ այժմ աղաչեմք զքեզ, Տէր, արա՛ զմեզ արժանի ընդունել զսուրբ խորհուրդս զայս, մեզ ի մեղաց թողութիւն, եւ գոհութեամբ փառաւորել զքեզ ընդ Որդւոյ եւ սուրբ Հոգւոյդ, այժմ եւ միշտ, եւ յաւիտեանս յաւիտենից. Ամէն:
Քահանայն բարձրացուսցէ զսուրբ մարմինն եւ զարիւնն ակներեւ ժողովրդեանն,
եւ ասասցէ առ նոսա բարձր

Ի սուրբ, ի սուրբ, պատուական մարմնոյ եւ յարենէ Տեառն մերոյ եւ փրկչին Յիսուսի Քրիստոսի, ճաշակեսցուք սրբութեամբ, որ իջեալ յերկնից բաշխի ի միջի մերում: Սա է կեանք, յոյս, յարութիւն, քաւութիւն եւ թողութիւն մեղաց: Սաղմոս ասացէք Տեառն Աստուծոյ մերոյ, սաղմոս ասացէք երկնաւոր թագաւորիս մերոյ անմահի, որ նստի ի կառս քերովբէականս:
Սարկաւագն Սաղմոս ասացէք Տեառն Աստուծոյ մերոյ, դպիրք, ձայնիւ քաղցրութեան, զերգս հոգեւորս: Զի սմա վայելեն սաղմոսք եւ օրհնութիւնք, ալէլուք եւ երգք հոգեւորք: Պաշտօնեայք, հանդերձ երգով սաղմոս ասացէք եւ զՏէր յերկինս օրհնեցէք:
Դպիրքն Օրհնեալ է Աստուած:
Քրիստոս պատարագեալ բաշխի ի միջի մերում. Ալէլուիա:
Զմարմին իւր տայ մեզ կերակուր. եւ սուրբ զարիւն իւր ցօղէ ի մեզ. Ալէլուիա:
Մատի՛ք առ Տէր եւ առէ՛ք զլոյս. Ալէլուիա:
Ճաշակեցէ՛ք եւ տեսէ՛ք զի քաղցր է Տէր. Ալէլուիա:
Օրհնեցէ՛ք զՏէր յերկինս. Ալէլուիա:
Օրհնեցէ՛ք զնա ի բարձունս. Ալէլուիա:
Օրհնեցէ՛ք զնա, ամենայն հրեշտակք նորա. Ալէլուիա:
Օրհնեցէ՛ք զնա, ամենայն զօրութիւնք նորա. Ալէլուիա:
Դպիրքն Տէր, ողորմեա՛. Տէր, ողորմեա՛.
Տէր, ողորմեա՛. Տէր, ողորմեա՛.
Արի՛ Աստուած հարցն մերոց,
Հա՛ս յօգնութիւն ծառայից քոց:
Ամենասուրբ Երրորդութիւն,
Տո՛ւր աշխարհիս խաղաղութիւն:
Եկեղեցւոյ պայծառութիւն,
Ազգիս Հայոց սէր, միութիւն:
Եւ հիւանդաց առողջութիւն,
Ննջեցելոց արքայութիւն:
Տէր, ողորմեա՛. Տէր, ողորմեա՛.
Յիսուս Փրկիչ, մեզ ողորմեա՛:
Քահանայն Զո՛ր օրհնութիւն, կամ զո՛ր գոհութիւն ի վերայ հացիս եւ բաժակիս ասասցուք, այլ, Յիսուս, զքեզ միայն օրհնեմք՝ հանդերձ Հարբդ եւ ամենասուրբ Հոգւովդ. այժմ եւ միշտ եւ յաւիտեանս յաւիտենից. Ամէն: Խոստովանիմ եւ հաւատամ, զի դու ես Քրիստոս Որդի Աստուծոյ, որ բարձեր զմեղս աշխարհի:
Քահանայն բեկեալ զսուրբ մարմինն արկցէ ի բաժակն արեան՝ ասելով
Լրումն Հոգւոյն սրբոյ:
Քահանայն առեալ զմի մասն ի ձեռս իւր, ասասցէ ի ծածուկ, գոհութեամբ առ Հայր
Հայր սուրբ, որ անուանեցեր զմեզ անուանակցութեամբ Միածնի քոյ, եւ լուսաւորեցեր մկրտութեամբ հոգեւոր աւազանին, արժանի արա ընդունել զսուրբ խորհուրդս զայս՝ մեզ ի մեղաց թողութիւն: Տպաւորեա՛ ի մեզ զշնորհս Հոգւոյդ սրբոյ՝ որպէս ի սուրբ առաքեալսն, որք ճաշակեցին եւ եղեն մաքրիչք ամենայն աշխարհի: Եւ արդ՝ Տէր, Հայր բարերար, զհաղորդութիւնս զայս մասնաւորեա՛ ճաշակման երեկոյին աշակերտացն՝ բառնալով զխաւար մեղաց իմոց: Մի՛ հայիր յանարժանութիւնս իմ. եւ մի՛ արգելուր զշնորհս Հոգւոյդ սրբոյ: Այլ ըստ անբաւ մարդասիրութեան քոյ, պարգեւեա՛ զսա քաւիչ մեղաց, լուծիչ յանցանաց:
Որպէս խոստացաւ եւ ասաց Տէր մեր Յիսուս Քրիստոս, թէ՝ Որ ուտէ զմարմին իմ, եւ ըմպէ զարիւն իմ, կեցցէ յաւիտեան: Արդ՝ արա՛ զսա մեզ ի քաւութիւն, զի որք կերիցեն եւ արբցեն ի սմանէ, հանցեն զօրհնութիւն եւ զփառս Հօր եւ Որդւոյ եւ Հոգւոյդ Սրբոյ, այժմ եւ միշտ եւ յաւիտեանս յաւիտենից. Ամէն:


Գոհանամ զքէն, Քրիստոս թագաւոր, որ արժանի արարեր զիս զանարժանս հաղորդել սուրբ մարմնոյ եւ արեան քոյ: Եւ այժմ աղաչեմ զքեզ, մի՛ լիցի սա ինձ ի դատապարտութիւն, այլ ի քաւութիւն եւ ի թողութիւն մեղաց, յառողջութիւն հոգւոյ եւ մարմնոյ, եւ ի կատարումն ամենայն գործոց առաքինութեան, որպէս զի սրբեսցէ սա զշունչս իմ, զհոգի եւ զմարմին իմ, եւ արասցէ զիս տաճար եւ բնակարան ամենասուրբ Երրորդութեանդ: Զի ընդ սուրբս քո արժանի եղէց փառաւորել զքեզ ընդ Հօր եւ ընդ սուրբ Հոգւոյդ՝ այժմ եւ միշտ եւ յաւիտեանս յաւիտենից. Ամէն:

Յովհաննու Ոսկեբերանին
Գոհանամ եւ մեծացուցանեմ եւ փառաւորեմ զքեզ, Տէր Աստուած իմ, զի զիս զանարժանս արժանացուցեր յաւուր յայսմիկ հաղորդակից լինել աստուածային եւ սոսկալի խորհրդոյ քոյ, անարատ մարմնոյդ եւ պատուական արեանդ: Վասն այսորիկ զսոսա ի բարեխօսութիւն ունելով, աղաչեմ, զամենայն աւուրս եւ ի ժամանակս կենաց իմոց՝ ընդ սրբութեան քոյ պահեա՛ զիս. որպէսզի յիշելով զբարեգթութիւնս քո, եւ կենդանի լինել ընդ քեզ՝ որ վասն մեր չարչարեցար եւ մեռար եւ յարեար: Մի՛ մերձեսցի, Տէր իմ եւ Աստուած, խորտակիչն՝ կնքելով անձին իմոյ պատուական արեամբդ քով: Ամենակարող, մաքրեա՛ զիս սոքօք յամենայն մեռելոտի գործոց իմոց՝ որ միայնդ ես անմեղ: Ամրացո՛ զկեանս իմ, Տէր, յամենայն փորձութենէ, եւ զպատերազմողն իմ դարձո՛ յետս պատկառեալ եւ ամաչեցեալ՝ որչափ յառնէ ի վերայ իմ: Ամրացո՛ զգնացս մտաց եւ լեզուի իմոյ եւ զամենայն ճանապարհս մարմնոյ իմոյ: Լե՛ր հանապազորդ ընդ իս՝ ըստ անսուտ խոստմանց քոց, թէ՝ Որ ուտէ զմարմին իմ եւ ըմպէ զարիւն իմ, նա յիս բնակեսցէ, եւ ես՝ ի նմա: Դու ասացեր, մարդասէր. կացո՛ զբանս աստուածային անլուծանելի հրամանաց քոց: Քանզի դու ես Աստուած ողորմութեան եւ գթութեան եւ մարդասիրութեան, եւ պարգեւիչ ամենայն բարեաց. եւ քեզ վայելէ փառք՝ հանդերձ Հարբդ եւ ամենասուրբ Հոգւովդ՝ այժմ եւ միշտ եւ յաւիտեանս յաւիտենից. Ամէն:



1 - 2 - 3 - 4 - 5 - 6 - 7 - 8 - 9 - 10 - 11 - 12

Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ