4. Քեսապի Հայ Կաթողիկէ Բարեյուսոյ Վարժարան

Հայ Դպրոցը երկրորդ տունն է հայ մանուկին ու հայ աշակերտին: Հայը` ուր որ ալ գտնուած է, ունեցած է իր հայկական դպրոցը: Այսպէս, Քեսապի Հայ կաթողիկէ առաջին յիշուած դպրոցը կառուցուած է Անտոնեան հայրերու կողմէ 1861 թուին: Միւս կողմէ, Քեսապի մէջ հաստատուած լատին հայրերը իրենք ալ կը բանան շարք մը դպրոցներ` Քեսապի, Պաղճաղազի, Գարատուրանի և Չընարճըգի մէջ: Քեսապի դպրոցին աղջկանց բաժինը կը յանձնուի Անարատ Յղութեան Հայ Քոյրերուն խնամքին, որ կը գործէ մինչեւ 1946 դէպի Մայր Հայաստան ներգաղթին ժամանակ: Նոյնը կը պատահի միւս դպրոցներուն, որոնք կը դատարկուին ներգաղթին ժամանակ: Այժմ միայն կը մնայ ու կը գործէ Քեսապի մէջ Հայ Կաթողիկէ Բարեյուսոյ Վարժարանը իր Մանկապարտէզ և Նախակրթարան զոյգ բաժիններով: 1997−ին կը նորոգուի և կը բարեզարդուի Գալուստ Կիւլպէնկեան Հաստատութեան նպաստով և կ՛ունենայ նոր հարկ մը ու արդիական սարքաւորում: Վարժարանս, իր տեսչական և ուսուցչական կազմերով, կը շարունակէ պահել իրեն վստահուած կրթական−բարոյական և ազգային−հոգեւոր դաստիարակութիւնը:

Այս բոլորին կողքին, դպրոցական տարեշրջանին ընթացքին, վարժարանս կը կազմակերպէ բազմապիսի ձեռնարկներ, արժէ յիշել Կաղանդ Պապայի հանդէսը և որուն ընթացքին, ծնողքներուն ներկայութեամբ, աշակերտները կը ներկայացնեն Ս. Ծնունդի և Կաղանդի առնջուող յայտագիրներ: Իսկ ամավերջի հանդէսը և վկայականաց բաշխումը տեղի կ՛ունենայ ուսուցչակազմի յատուկ կազմակերպութեամբ և բոլոր աշակերտներուն մասնակցութեամբ և ելոյթով:

Արդ, որպէս սփիւռքեան Հայ վարժարան, իր զրահուած ուսուցչական ու դաստիարակչական բարձր մակարդակով, մարդկային, ազգային և հոգեւոր մաքուր տեսլականներով կ`առաջնորդէ մեր այսօրուան հայ մանուկներուն քայլերը և վաղուան պատանիներուն քաջարի ոստումները, դէպի կեանքի ամենաապահով ափերը յաջողութեան, կերտելով մեր զաւակներուն մէջ իրենց մանկութենէն սկսեալ կատարեալ Մարդը, ազգասէր և հայրենասէր Հայը ու հաւատացեալ քրիստոնեան:


5. Հայ Կաթողիկէ Պատանեկան Միութիւն

Քեսապի Հայ Կաթողիկէ Եկեղեցին, հին օրերէն ունեցած է իր շուրջ Կիրակնօրեայի պատանեկան շարժում, այդ շարժումը կոչուած է «Կիրակնօրեայ», աւելի կանոնաւորապէս գործած է 1983−էն ի վեր շնորհիւ խումբ մը նուիրեալ երիտասարդներու, և 1993−ին երբ յիշուեցաւ այդ շարժման 10 ամեակը, ան կոչուեցաւ այդ օրէն ի վեր «Հ.Կ.Մ.» այսինքն` Հայ Կաթողիկէ Միութիւն: 1995−ին Հ.Կ.Մ.ի պատանեկան միջ−մասնաճիւղային 3−րդ համագումարէն ետք, ան ունեցաւ նաեւ իր պաշտօնական Կանոնագիրը:

Հ.Կ.Մ. պատանեկանի նպատակն է պատանիներուն ապահովել քրիստոնէական և հայկական դաստիարակութիւն, զանոնք միշտ մօտեցնելով եկեղեցւոյ և տոգորելով անոնց սրտերը հայկականութեամբ ու հայասիրութեամբ:

Հ.Կ.Մ.ը ունի իր հոգեւոր վարիչ վարդապետը և պատանեկան խորհուրդ մը որպէս պատասխանատուներ: Հ.Կ.Մ.ը ունի դաստիարակչականէն զատ զանազան գործունէութիւններ` ընկերային, մարզական և գեղարուեստական մարզերէն ներս:


6. Քեսապի Հայ Կաթողիկէ Տիկնանց Միութիւն

Քեսապի Հայ Կաթ. Տիկնանց միութիւնը որպէս օրինաւոր և պաշտօնական կերպով գործող միութիւն, կազմուած է 1996 թուին, սակայն այդ թուականէն առաջ միշտ գոյութիւն ունեցած է խումբ մը կամաւոր ու ժրաջան տիկիններ և անձնուէր օրիորդներ որոնք բոլոր նուիրուածութեամբ կ՛ապահովէին եկեղեցւոյ բարեզարդումը ու բարեկարգաւորումը: Սոյն միութիւնը ունի իր վարչակազմը, անդամուհիները և իր հոգեւոր վարիչը: Նպատակն է ապահովել եկեղեցւոյ բարեզարդումը, կազմակերպել մշակութային և այլեւայլ ձեռնարկներ, ինչպէս նաեւ վառ պահել մեր ժողովուրդին մէջ հայկական աւանդութիւնները բազմատեսակ միջոցառումներուն ընդմէջէն:



Առօրեայ Աւետարանը
Այբ Էջ | Բովանդակութիւն | Հասցէարան | Օգտակար Կապեր | Նամականի
Ներքին Պրպտում՝  Armenian Keyboard
Կարդացէ՛ք այս էջը հետեւեալ լեզուներով.-    
Վերարտադրութեան ամէն իրաւունք վերապահուած է Հայ Կաթողիկէ Եկեղեցւոյ