Պէյրութ, Լիբանան
Շաբաթ, 13 Մարտ 2010-ի երեկոյեան, Հայ Կաթողիկէ Մեսրոպեան Բարձրագոյն Վարժարանը կազմակեց իր տարեկան բարեսիրական ճաշկերոյթը, ներկայութեամբ Տանն Կիլիկիոյ Կաթողիկէ Հայոց Տէր Ներսէս Պետրոս ԺԹ. Կաթողիկոս Պատրիարքին եւ նախագահութեամբ Տէր եւ Տիկին Վարուժ Ներկիզեանի։ Սոյն ձեռնարկին հանգանակուած ողջ գումարը պիտի փոխանցուի կարիքաւոր սաներու ֆոնտին։
Հայ Կաթողիկէ Մեսրոպեան Բարձրագոյն Վարժարանի տնօրէն՝ Պր. Գալուստ ըսաւ, որ սփիւռքի բաբախուն սիրտը հանդիսացող Լիբանանին մէջ որպէսզի հայը ապրի հայօրէն, պէտք է հայ եկեղեցւոյ կողքին անսասան մնայ նաեւ հայ դպրոցը, իսկ 71-ամեայ կեանք ունեցող Մեսրոպեան վաժրարանը լիբանանահայ ամէնէն մեծ կրթական համալիրն է, որ ունի աւելի քան 1300 աշակերտներ իր զոյգ վարժարաններով։ «Գիտէք, որ տարիներու ընթացքին Մեսրոպեան վարժարանը միշտ եղած է զարգացման ընթացքի մէջ՝ ըլլայ ուսումնական կամ շինարարական մարզերու մէջ»։
Այս առթիւ Պր. Գալուստ ըսաւ, որ «ստանալէ ետք Ամենապատիւ եւ Գերերջանիկ Հոգեւոր Տիրոջ օրհնութիւնը, վարժարանիս տնօրէնութիւնը որոշեց իր շնորհակալութիւնը մեր մեծարգոյ բարերարին յայտնել իւրայատուկ ոճով, շնորհելով անոր «Ս. Մեսրոպ Մաշտոց»ի յուշամետալը»։ Պր. Վարուժ Ներկիզեանը վերջին տարիներուն իր հանգուցեալ հօր յիշատակին հաստատած է անոր անունը կրող՝ «Աբրահամ Ներկիզեան» հիմնադրամը, իսկ իւրաքանչիւր տարի վարժարանի կողմէն կազմակերպուող տարեկան ճաշկերոյթներուն ան՝ իր եւ իր ազնուափայլ տիկնոջ անունով կը կատարէ աւանդական դարձուցած իշխանական օժանդակութիւնը։
Վարժարանի իւրաքանչիւր հայ կարիքաւոր աշակերտի անունով եւ Մեսրոպեան վարժարանի մեծ ընտանիքի իւրաքանչիւր անդամի անունով շնորհաւորելով Պր. Վարուժ Ներկիզեանին՝ յուշամետալի տուուչութեան առիթով, վարժարանի տնօրէն Պր. Կրէկուար Գալուստ խնդրեց, որ Ամենապատիւ եւ Գերերջանիկ Հոգեւոր Տէրը անձամբ յանձնէ յուշամետալը, շեշտելով, որ «Դուն իսկապէս արժանի ես այս պարգեւին, որ մեր ամենատաք զգացումներուն առհաւատչեան է»։