Պուրճ Համուտ
Երեքշաբթի, 19 Ապրիլ 2011-ի առաւօտեան ժամը 9։30-ին Մեսրոպեան վարժարանի առաջինէն մինչեւ աւարտական դասարաններու աշակերտութիւնը հաւաքուած էր վարժարանի շրջափակին մէջ, ոգեկոչելու ապրիլեան նահատակներու յիշատակը։
Լիբանանի եւ Հայաստանի պետական քայլերգներու ունկնդրութենէն յետոյ, ձեռնարկի բացման խօսքով հանդէս եկաւ աւարտական դասարանի աշակերտուհի՝ Ռուբինա Թովմասեան, որ իր խօսքին մէջ ըսաւ. «Հայոց Ցեղասպանութենէն 96 տարիներ ետք եկաւ անգամ մը եւս հաստատելու մեր ուխտը՝ յարգել մեր 1.5 միլիոն նահատակները, պահանջել մեր 1.5 միլիոն նահատակներու նարեան գինն ու արժանապատուութիւնը, վերադարձնել գրաւուած հողերը, Մուշը, Սասունն ու Վանը, եւ վերջապէս, կերտել ամբողջական հայրենիքը»։ Այնուհետեւ շարունակելով խօսքը, ան կոչ ուղղեց իր դասընկերներուն, ըսելով. «Պիտի շարունակենք երթը եւ դէմ յանդիման պիտի կանգնինք բոլոր տեսակի դժուարութիւններուն, քանի որ մենք մեր նահատակներուն ժառանգորդներն ենք, եւ իրաւունք չունինք պահ մը իսկ կանգ առնելու։ Մեզմէ իւրաքանչիւրը, իր կարելիութեան սահմաններուն մէջ Հայ Դատի պայքարին մէջ ընելիք ունի, Հայ Դատի զինուոր է։ Ուրեմն, ժամանակն է միասնաբար սուգը վերածելու յաղթանակի, որ կը կերտուի հաւաքական ջանքերով եւ միասնակամ ճիգերով»։
Բացման խօսքին յաջորդեց վարժարանի մանկապարտէզի ուսուցչուհի, երգչուհի՝ Լիզա Սվաճեանի կատարումը։ Ան երգեց հայրենասիրական թեմայով զոյգ երգեր։
Այնուհետեւ հրաւիրուեցաւ օրուան պատգամախօսը, «Վանայ Ձայն» ձայնասփիւռի կայանի տնօրէն՝ պր. Աւօ Կիտանեանը, որ իր խօսքին մէջ յատկապէս կարեւորեց այն հանգամանքը, որ 96 տարիներ յետոյ ալ այս տեսակ հաւաքները կու գան փաստելու, որ մեր 1.5 միլիոն զոհերու յիշտակը անմեռ է։ Եւ որ ցուցահանդէսին (վարժարանի շրջափակին մէջ բացուած էր 4-րդէն մինչեւ 8-րդ դասարաններու աշակերտութեան «Վերածնունդ, վերականգնում» խորագիրով նկարչական գործերու ցուցահանդէսը) ներկայացուած գործերը դուրս ելած են աւանդական սեւ-ճերմակի սահմաններէն, եւ արդէն գոյները կը խօսին այն մասին, որ Ապրիլ 24-ը սուգի օրէն վերածուած է վերածնունդի օրուայ մը։ Պր. Կիտանեան նաեւ անդրադարձաւ նորօրեայ սերունդներու կարեւորագոյն ընելիքներուն, որոնք յատկապէս պէտք են յաղթելու համար մէկ այլ՝ աւելի վտանգաւոր թշնամիի՝ ձուլումի, լուծուելու վտանգին։ Նաեւ մեծարգոյ պատգամախօսը յորդորեց կարեւորութեամբ մօտենալ այն խնդիրին, որը պէտք է նաեւ վերածուի առօրեայ կարեւոր սկզբունքի մը, որն է «ոչ» ըսել թրքական արտադրութիւններուն, պարզապէս չգնելով ատոնք։
Նախկին մեսրոպեանցի, օրուան պատգամախօսի խօսքին յաջորդեց երրորդ դասարանցի խումբ մը աշակերտներու՝ Սելին Ղազարեանի, Նայիրի Եթերեանի, Սառա Թեքիրեանի, Սինթիա Կեմիճեանի, Սթեֆանի Գույումճեանի եւ Լիւսի Ֆըստըգճեանի «Ապրիլեան Նահատակ» ասմունքը, որմէ յետոյ միջնակարգ բաժինի աշակերտուհիներէն Նայիրա Պաղտասարեան կատարեց «Armenian Cause» երգը, այսպիսով եզրափակելով ձեռնարկը։
Ձեռնարկի աւարտին բոլոր աշակերտները ուշի-ուշով դիտեցին ցուցադրուած աշակերտական գործերը։
ՏԵՍՉԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ
ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ