Պէյրութ, Լիբանան
Անարատ Յղութեան Հայ Քոյրերու Միաբանութիւնը կը գուժէ մահը քոյր Նարդուհի մկրտութեան անունով՝ Ալիս Ուստաքարայեան, որ պատահեցաւ կիրակի 9 Մայիս 2010։
Յուղարկաւորութեան արարողութիւնը տեղի ունեցաւ երկուշաբթի 10 Մայիսին, Զմմառու մէջ։
Քոյր Նարդուհի Ուստաքարայեան ծնած է Այնթապ, 29 Մարտ 1919-ին։ Ան կը յաճախէ Անարատ Յղութեան Հայ Քոյրերու Քեսապի դպրոցը: 1936-ին կը մեկնի Հռոմ մաս կազմելու համար քոյրերու միաբանութեան: 3 տարիներ ետք, 1939-ին, կրօնաւորական սուրբ ուխտերը կը կատարէ:
Քոյր Նարդուհին կը պաշտօնավարէ Պէյրութի, Քեսապի, Պուրճ Համուտի, Դամասկոսի, Զահլէյի, Անճառի, Ամմանի, Թեհրանի, Հալէպի եւ Զմմառու մէջ:
Հայ կաթողիկէ պատրիարքարանը եւ կայքէջի պատրիարքական յանձնախումբը կը ցաւակցին անոր պարագաներուն եւ Անարատ Յղութեան Հայ Քոյրերու Միաբանութեան, այս մեծ կորուստին համար: Թող Աստուած ընդունի զինք իր Արքայութեան մէջ եւ Եկեղեցւոյ եւ միաբանութեան տայ նորանոր կոչումներ: