Պէյրութ, Լիբանան
Մեսրոպեանցի սպիտակազգեստ 45 հրեշտակներ, Շաբաթ, 8 Մայիս 2010-ի կէսօրէ ետք ժամը 4։00-ին, Հայ Կաթողիկէ Սուրբ Փրկիչ եկեղեցւոյ մէջ հաւաքուեր էին, մասնակցելու հոգեպարար եւ հանդիսաւոր արարողութեան մը, որուն անհամբեր եւ երկար ժամանակէ ի վեր կը սպասէին։ Եկեղեցւոյ մէջ, անոնց ուրախութեան մասնակից էին հոգեւոր հայրեր, վարժարանի պատասխանատուներ, ուսուցիչ-ուսուցչուհիներ, ծնողներ եւ բարեկամներ։
Մեր հրեշտակները եկած էին, իրենց հետ բերելով ցորեն ու խաղող, որոնք պիտի սրբագործուէին, դառնալով Յիսուսին մարմինն ու արիւնը։ Ինչպէս որ Յիսուս ըսած էր իր առաքեալներուն. «Առէք եւ բաժնուեցէ՛ք, որովհետեւ ասկէ ետք երբեք պիտի չխմէք այգիի բերքէն մինչեւ գայ Աստուծոյ Արքայութիւնը։ Ասիկա իմ մարմինս է տրուած բազմութեան համար, ասիկա ըրէք իմ յիշատակիս համար։ Այս բաժակը նոր Ուխտն է իմ արիւնովս, որ կը հեղու ձեզի համար (ըստ Ղուկասու)», այնպէս ալ օրուան պատարագիչը ըսաւ մեր մանուկներուն, նախքան անոնց Հաղորդութիւն տալը։
Ա. Հաղորդութեան Սուրբ եւ Անմահ Պատարագը մատուցեց Արհիապատիւ Հայր Յովհաննէս Եպս. Թէյրուզեան, անոր առընթերականն էր՝ Սուրբ Փրկիչ եկեղեցւոյ ժողովրդապետ՝ Հայր Սարգիս Վրդ. Դաւիթեան, ինչպէս նաեւ օգնական ժողովրդապետ՝ Հայր Սեպուհ Վրդ. Կարապետեան։
Եկեղեցւոյ մէջ 45 մատղաշ եւ անմեղ հոգիներ սրբաբուխ աղօթեցին ու Յիսուսին նուիրուած երգեր երգեցին։ «Քեզի կու գամ, Ո՛վ Յիսուս» ըսելով անոնք հաղորդուեցան Ս. Փրկչին հետ, իրենց սիրտն ու հոգին յաւերժ նուիրելով Անոր։
Ա. Հաղորդութեան հոգեւոր արարողութենէն յետոյ, հաղորդութիւն ստացած բոլոր մանուկները ստացան յատուկ յուշանուէրներ, այնուհետեւ բոլորը հաւաքուեցան Սուրբ Փրկիչ եկեղեցւոյ սրահին մէջ, ուր տեղի ունեցաւ կոկիկ հիւրասիրութիւն եւ ընդունուեցան շնորհաւորութիւններ։
ՏԵՍՉԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ ՄԵՍՐՈՊԵԱՆ
ԲԱՐՁՐԱԳՈՅՆ ՎԱՐԺԱՐԱՆԻ