Պէյրութ, 26 Մարտ 2013
Դիւան թիւ 75/13
Ազնուափայլ տիկին Հրանուշ Հակոբեան
Հ.Հ. Սփյուռքի նախարարություն
Երեք օր առաջ ստացանք Ձեր նամակը, որուն մէջ մեզ կը հրաւիրէք մասնակցելու Ապրիլ 9-ին կայանալիք Հ.Հ. վսեմաշուք Նախագահի երդման արարողութեան:
Դժբախտաբար, պիտի չկարենանք մասնակցիլ վերոյիշեալ պատմական երդման արարողութեան: Սոյն արարողութեան սակայն մեզ կրնայ ներկայացնել, եթէ բրոթոքոլային օրէնքը կը թոյլատրէ, Արհիապատիւ Գերպ. Ռափայէլ Արքեպիսկոպոս Մինասեանը, Հայաստանի եւ Արեւելեան Եւրոպայի մեր Առաջնորդը, որ Ձեզի խիստ ծանօթ է:Ձեզմէ կը խնդրենք որ բարեհաճիք Արհիապատիւ Գերապայծառին հաղորդել Ձեր պատասխանը:
Այս Աւագ Շաբթուան ընթացքին, մեր աղօթքը կը բարձրացնենք առ Ամենակալն Աստուած, որպէսզի շնորհէ յաջողութիւն եւ բարգաւաճում մեր սիրելի Մայր Հայրենիքին, մաղթելով Ձեզի ամէն բարիք Քրիստոսի Սուրբ Յարութեան տօնին առիթով:
Հայրական Օրհնութեամբ՝
+ Ներսէս Պետրոս ԺԹ.
Կաթողիկոս Պատրիարք Տանն Կիլիկիոյ
Կաթողիկէ Հայոց