Կենսագրական

Ծնած է 1946թ. Հոկտեմբերի 24-ին:

1958թ. կ’ընդունուի Զմմառի Պատրիարքական Միաբանութիւն ընծայարան, ուր կը ստանայ դպրոցական բարձրագոյն կրթութիւն:

1966թ. կ’ուղարկուի Հռոմի քահանայապետական Լեւոնեան հայ վարժարան եւ կ’աշակերտ է քահանայապետական Գրիգորեան համալսարանին մէջ, ուրկէ կը ստանայ փիլիսոփայութեան եւ աստուածաբանութեան վկայականները: Ուսումը կը շարունակէ Հռոմի Սալեզեան համալսարանին մէջ` մասնագիտանալով գործնական հոգեբանութեան մէջ:

1973թ. Յունիս 24-ին Լիբանանի մայրաքաղաք Պէյրութի մէջ կը ձեռնադրուի կուսակրօն քահանայ:

Մինչեւ 1980 թուական կը ստանձնէ Պէյրութի Սուրբ Գրիգոր Լուսաւորիչ-Սուրբ Եղիա Աթոռանիստ Եկեղեցւոյ հովուութիւնը: 1978թ. Նշանակուած է Լիբանանի Հայ Կաթողիկէ եկեղեցական ատեանի քարտուղար, ապա՝ եկեղեցական դատաւոր՝ մինչեւ 1989 թուականը:

1980 – 1984թթ. ծիսագիտութիւն կը դասաւանդէ Պէյրութի Քասլիք Սուրբ Հոգի համալսարանին մէջ:

1983 – 1986թթ. կ’ըլլայ Զալքայի (Լիբանան) Սուրբ Խաչ եկեղեցւոյ ժողովրդապետ: Անոր շնորհիւ է արդարեւ որ կառուցուած է Զալքայի Սուրբ Խաչ եկեղեցին:

1986 – 1988թթ. կ’ըլլայ պատրիարքական քարտուղար:

1988 – 1990 թթ. դարձեալ կ’անուանուի Զալքայի Սուրբ Խաչ եկեղեցւոյ ժողովրդապետ` միաժամանակ վարելով նորակառոյց պատրիարքական վարժարանի տնօրէնի պաշտօնը:

1990 – 2006թթ. կ’անուանուի ԱՄՆ- ի Քալիֆորնիա նահանգի ժողովրդապետ:

Կ’ըլլայ «Armenian Alliance» բարեգործական հիմնադրամի գլխաւոր հիմնադիր անդամներէն մէկը, որուն հովանաւորութեամբ Հայաստանի մէջ կ’իրականացուին բազմաթիւ մարդասիրական եւ բարեգործական ծրագիրներ: Հայր Ռաֆայէլ Մինասեան Կլէնտելի մէջ կը ձեռնարկէ Սուրբ Գրիգոր Լուսաւորիչ Հայ Կաթողիկէ եկեղեցւոյ կառուցման, որուն օծումը տեղի կ’ունենայ 2001թ.՝ ի յիշատակ Հայաստանի մէջ Քրիստոնէութեան ընդունման 1700 ամեակին:

2005թ. Սեպտեմբերին Ամենապատիւ Ներսէս Պետրոս ԺԹ Կաթողիկոս Պատրիարքը Ռաֆայէլ վրդ. Մինասեանը կ’անուանէ պատրիարքական Փոխանորդ Երուսաղէմի եւ Ամմանի Փոխանորդութեան:

2005թ. Իտալիոյ մէջ կը հիմնէ «Telepace Armenia» հեռուստակայանը:

2009թ. Երուսաղէմի Հայ Կաթողիկէ համալիրին մէջ գտնուող Քրիստոսի Խաչի ճանապարհի 4-րդ կայանին մէջ, Հայր Ռաֆայէլը հաստատած է Սուրբ Հաղորդութեան մնայուն երկրպագութիւնը, որուն շարունակականութիւնը ապահովուած են Սուրբ Պօղոսի Միաբանութեան քոյրերը:

2011թ. Յունիս 24-ին Պենետիկտոս ԺԶ. Սրբազան քահանայապետի յատուկ պապական կոնդակով Հ. Ռաֆայէլ Մինասեանը կ’արժանանայ եպիսկոպոսական կարգի, որպէս նորանշանակ Տիտղոսաւոր Արքեպիսկոպոս Կապադովկիան Կեսարիոյ Հայոց եւ Առաջնորդ Հայաստանի, Վրաստանի, Ռուսաստանի եւ Արեւելեան Եւրոպայի Կաթողիկէ Հայոց:

Եպիսկոպոսական ձեռնադրութիւնը տեղի կ’ունենայ 2011թ. Յուլիս 16-ին Պէյրութի Սուրբ Գրիգոր Լուսաւորիչ – Սուրբ Եղիա Աթոռանիստ եկեղեցւոյ մէջ ձեռամբ Ամենապատիւ Ներսէս Պետրոս ԺԹ. Կաթողիկոս Պատրիարքին, ներկայութեամբ Վատիկանի Արեւելեան Եկեղեցիներու Ժողովի կառավարիչ Վսեմաշուք Կարդինալ Լէոնարտօ Սանտրիին:

2011թ. Օգոստոս 7-ին Շիրակի մարզի Արեւիկ գիւղի Ս. Գրիգոր Լուսաւորիչ եկեղեցւոյ մէջ տեղի կ’ունենայ Հայր Ռաֆայէլ Արքեպս· Մինասեանի Գահակալութեան արարողութիւնը:

2021-ի Սեպտեմբերի 23ին Արհ. Ռաֆայէլ Արք. Մինասեան կը դառնայ Տանն Կիլիկիոյ Կաթողիկէ Հայոց ԻԱ. կաթողիկոս Պատրիարք, ստանալով Գերերջանիկ Ռաֆայէլ Պետրոս ԻԱ. Մինասեան անունը։