Շաբաթ, 29 Սեպտեմբեր 2018-ի առաւօտեան ժամը 10:30-ին, Հռոմի Ս. Նիկողայոս Հայ կաթողիկէ եկեղեցւոյ մէջ, Հայրապետական Ս. եւ անմահ Պատարագ մատոյց Ամենապատիւ եւ Գերերջանիկ Տէր Գրիգոր Պետրոս Ի. Կաթողիկոս Պատրիարքը Տանն Կիլիկիոյ կաթողիկէ Հայոց: Պատարագի ընթացքին տեղի ունեցաւ եպիկոպոսական ձեռնադրութիւնը Լատին Ամերիկայի նորընտիր առաջնորդ գերյարգելի Պօղոս Լեւոն ծ. վ. Հաքիմեանի, ձեռամբ Ամենապատիւ Հոգեւոր Տիրոջ, որուն կողքին երկու ձեռնադրակից եպիսկոպոսներն էին Արհի. Հ. Վարդան եպս. Պօղոսեան, վաստակաւոր առաջնորդը Լատին Ամերիկայի Հայ կաթողիկէ թեմի եւ Արհի. Հ. Գէորգ եպս. Ասատուրեան, Պէյրութի թեմի Պատրիարքական փոխանորդը։
Ս. Արարողութեան ներկայ գտնուեցան Արեւելեան եկեղեցիներու ժողովի նախագահ Վսեմաշուք Կարդինալ Լէոնարտօ Սանտրի, Հայաստանի, Վրաստանի, Ռուսաստանի եւ Արեւելեան Եւրոպայի առաջնորդ Արհի. Տ. Ռաֆայէլ արք. Մինասեան, Եգիպտոսի թեմի առաջնորդ եւ Պատրիարքական փոխանորդ Արհի. Տ. Օգոստինոս Գրիգոր եպս. Գուսան, Յունաստանի թեմի առաքելական կառավարիչ Գերապայծառ Տ. Յովսէփ թ.ծ.վ. Պէզէզեան, Քահանայապետկան Լեւոնեան հայ վարժարանի մեծաւոր գերյարգելի Հ. Նարեկ ծ.վ. Նաամոյեան, գերյարգելի եւ գերապատիւ վարդապետներ, արժանապատիւ քահանաներ, առաքինազարդ քոյրեր, Հաքիմեան ընտանիքի անդամներ եւ մեծ թիւով հաւատացեալներ:
Ձեռնադրութեան առաջին մասը տեղի ունեցաւ Ուրբաթ, 28 Սեպտեմբեր 2018-ի երեկոյեան ժամը 18:45-ին յաւարտ երեկոյեան ժամերգութեան:
ԺԱԳ ՔԷՇԻՇԵԱՆ
